Dicitencello a 'sta cumpagna vosta
ch'aggio perduto 'o suonno e 'a fantasia…
ch''a penzo sempe,
ch'è tutt' 'a vita mia…
I' nce 'o vulesse dicere,
ma nun ce 'o saccio dí…
'A voglio bene…
'A voglio bene assaje!
Dicitencello vuje
ca nun m' 'a scordo maje.
E' na passione,
cchiù forte 'e na catena,
ca me turmenta ll'anema…
e nun me fa campá!…
Na lácrema lucente v'è caduta…
dicíteme 'nu poco: a che penzate?!
Cu st'uocchie doce,
vuje sola mme guardate…
Levámmoce 'sta maschera,
dicimmo 'a veritá…
Suonno gentile,
suspiro mio carnale…
Te cerco comm' all'aria:
Te voglio pe' campá!…